Newyddion

Mae prosiectau tai a arweinir gan y gymuned yn rhoi pobl wrth galon y gwaith o greu’r cartrefi a’r lleoedd maen nhw eisiau byw ynddynt. Mae’n rhoi cyfle i gymunedau ymateb yn uniongyrchol i anghenion tai lleol a chreu lleoedd sydd wedi’u dylunio ar sail uchelgeisiau a blaenoriaethau cyffredin.

Mae cyflwyno’r prosiectau hyn yn gallu bod yn heriol. Mae mynediad at dir a chyllid yn rhwystrau mawr, heb anghofio’r amser, yr arbenigedd, a’r capasiti sydd eu hangen i gyflawni’r broses gynllunio a datblygu.

Nid yw dyluniad da yn gallu goresgyn yr holl heriau hyn, ond fe allai helpu cymunedau i fanteisio i’r eithaf ar y cyfleoedd sydd ar gael iddynt a throi eu huchelgeisiau’n llefydd llwyddiannus a chynaliadwy.

Mae prosiectau tai dan arweiniad y gymuned yn aml yn dechrau gyda syniad da o’r hyn y mae grŵp eisiau ei gyflawni – i bwy y mae’r cartrefi’n cael eu creu, sut y gallai pobl fyw, y math o gymuned y maent am ei chreu a’r gwerthoedd a ddylai fod yn sail i’r prosiect.

Mae dylunio da yn hanfodol er mwyn gwireddu’r uchelgeisiau hyn. Mae hyn yn golygu bod angen meddwl am y cartrefi yn ogystal â sut y mae’r datblygiad yn ymateb i’w gyd-destun; ei gysylltiadau, tirwedd a hunaniaeth; y berthynas rhwng cartrefi, mannau cymunedol a mannau cyhoeddus; cynaliadwyedd; a sut gall y datblygiad gyfrannu’n gadarnhaol at y gymuned bresennol.

Comisiwn Dylunio Cymru sy’n darparu’r Gwasanaeth Adolygu Dyluniadau cenedlaethol yng Nghymru. Maen nhw’n rhoi cyngor dylunio arbenigol i helpu i wella ansawdd datblygiadau a chreu lleoedd gwell i bobl. Mae’r gwasanaeth Adolygu Dyluniadau yn dod â phanel annibynnol ac amlddisgyblaethol o weithwyr proffesiynol profiadol ynghyd i roi adborth adeiladol ar gynigion. Ariennir y gwasanaeth gan Lywodraeth Cymru ac mae’n cael ei ddarparu’n rhad ac am ddim i brosiectau ledled Cymru.

Rydym yn annog grwpiau tai a arweinir gan y gymuned i gyflwyno eu prosiectau gerbron y gwasanaeth ar gam cynnar yn y broses ddylunio. Gall cymryd rhan mewn Adolygiad Dylunio yn gynnar helpu grwpiau i fanteisio i’r eithaf ar botensial eu safle, ystyried sut y gellir troi eu huchelgeisiau’n ddatblygiad llwyddiannus, nodi’r prif gyfleoedd a’r heriau, a chryfhau cynigion wrth iddynt ddatblygu.

Gall prosiectau ddod yn ôl at y gwasanaeth Adolygu Dyluniadau wrth i’r cynigion ddatblygu i gael cyngor annibynnol a chyson drwy gydol y broses.

Os ydych chi’n ymwneud â phrosiect tai a arweinir gan y gymuned yng Nghymru sydd â safle neu gynigion ar y gweill, cysylltwch â ni i drafod sut gall y gwasanaeth Adolygu Dyluniadau gefnogi eich prosiect.

 

Cysylltwch â ni ar connect@dcfw.org.